Upptekin af frægðinni!

Ég var svo upptekin af því áðan að vera fræg að ég gleymdi næstum að fara í Skífuna og ná í miða á tónleika Megasar á morgun. Ungur piltur sem vinnur á kassa í Hagkaup í Kringlunni þekkti röddina mína úr umferðarútvarpinu!!! Það gerist svona tvisvar á ári og þá verð ég svo obbbboðslega fræg að ég gleymi stund og stað....

Já, helgin að skella á og Megasartónleikar á morgun. Ég hlakka mikið til.

Í kvöld eigum við von á samstarfsmönnum Gulla úr kosningasjónvarpinu í mat, þeim Palla Ben og Jóhönnu Vigdísi með mökum.

Ég ætla að hafa fetaost í forrétt (verðlaunauppskrift mína), svínalundir í aðalrétt og pönnukökur með rjóma með kaffinu. Búin að kaupa hvítt og rautt og svo verður bara gaman. Er að vinna til að verða fimm og svo verður allt sett á fullt á heimilin..... 

Athugasemdir

[Jens Guð, 12.10.2007 kl. 22:06]

  Það er rosalega gaman að vera pínulítið frægur.  En klárlega ekki gaman að vera mikið frægur.  Fyrir rösklega 30 árum sá ég um poppþátt í Þjóðviljanum.  Eitt sinn var ég í strætó og nokkrir unglingsstrákar,  12 - 13 ára,  báðu mig um eiginhandaráritun.  Það var rosalega gaman. 

  Þegar ég skrepp til Færeyja upplifi ég þetta aftur.  Þar er ég oft beðinn um eiginhandaráritun og fólk vill ljósmynda sig með mér.  Það gefur "kikk".  Þegar ég skrifaði Poppbókina dæmalausu 1983 var ég skyndilega umkringdur fólki sem bað mig um að árita bókina.  Um sama leyti heimsótti ég Bubba nokkrum sinnum.  Þá kynntist ég því áreiti sem virkilega frægt fólk verður fyrir.  Síminn hjá honum stoppaði ekki.  Það var neikvætt áreiti.  Mikið er ég feginn að vera ekki í þeirri stöðu. 

  Það skrítna við að vera pínulítið frægur er að fólk sem er virkilega frægt fer að heilsa manni eins og kunningjum.  Án þess að maður þekki það fólk.

  Þetta er ég að upplifa aftur eftir að ég fór að blogga.  Auðvitað geri ég mér grein fyrir því að ég er ekki frægur þannig lagað.  En stjórnmálamenn og fjölmiðlafólk er farið að heilsa mér með handabandi án þess að ég þekki viðkomandi.  En bara gaman.  Þetta er svona "miní" frægð.  Góð í hófi og skemmtileg.  Jafnframt eru farnir að hellast yfir mig boðsmiðar á hljómleika,  leikrit og þess háttar.  Það er gaman.