Einelti

Við spyrjum drottin særð, hvers vegna hann

hafi það dularfulla verklag

að kalla svo vænan vinnumann

af velli heim á bæ um miðjan dag.

 

Og þó, með trega og sorg, skal á það sæst,

að sá með rétti snemma hvílast megi

í friði, er hafði, fyrr en sól reis hæst,

fundið svo til, að nægði löngum degi

(Jóhann Hannesson)

 

Þetta fallega ljóð orti frændi minn þegar ungur vinur hans svipti sig lífi.

Það hefur verið umræða í blöðum undanfarið vegna ungs manns sem tók sitt eigið líf vegna vanlíðunar eftir hroðalegt einelti sem hann varð fyrir í skóla.

Ég verð svo svakalega reið þegar ég hugsa um allt unga fólkið sem má þola þvílíka meðferð og líða svona illa vegna gjörða skólafélaga.

Í huga margra er einelti oftast líkamlegt; það er strítt og stolið og lamið og sparkað.

En félagslegt einelti er ekki síður alvarlegt. Orð - sögð og ósögð - baki snúið í viðkomandi - viðkomandi ekki svarað. Þetta er alveg nóg til að rífa niður unga sál.

"Farðu eitthvað annað"

"Þetta sæti er upptekið og þú veist það"

"Er ekki xxxx að leita að þér?"

"Sérðu ekki eftir því að hafa fæðst?"

"Lífið hlýtur að vera ömurlegt hjá þér"

"Mikið væri gott ef þú værir ekki til"

Já ljótt er þetta - og svei ykkur sem látið svona við aðra

Og hvernig fer þetta með fjölskylduna alla þegar barnið verður fyrir einelti? Systkin hafa mikilar áhyggjur og skynja svo sannarlega vanlíðan systkina sinna. Foreldrar standa oft á tíðum ráðþrota og reiðir. Mömmur gráta sig í svefn.

Það er enginn fjölskylda hamingjusamari en óhamingjusamasti meðlimur hennar.

Athugasemdir

[Helga Magnúsdóttir, 30.7.2008 kl. 12:42]

Einelti er hræðilegt ofbeldi og ekkert annað, hvort sem það er félagsleg útskúfun eða annað. Úlli minn lenti aðeins í einelti í fyrsta bekk en við fundum ráð við því sem dugði. Svo var gert svokallað eineltispróf í bekknum, þar sem börnin voru spurð með hverjum þau vildu helst gera hitt og þetta sem var tiltekið, og kom hann mjög vel út úr því sem betur fer. Einelti verður að stöðva því það hefur brotið margar sálir og jafnvel kostað mannslíf.

[Laufey (IP-tala skráð) 31.7.2008 kl. 12:30]

Það er svo sorglegt til þess að hugsa hversu margir verða fyrir einelti og stundum svo sáralítið hægt að gera.

Ég er svo hjartanlega sammála síðustu orðunum í færslunni.