Takk fyrir blómin Sesselja!

Þegar ég kom úr mat á miðvikudag þá beið þar mín fallegur vöndur af páskaliljum. Kort fylgid með og á því stóð - Kristín Björg, takk fyrir Spegilinn, Gleðilega páska, Sesselja.

Í fyrstu þá skildi ég hvorki upp né niður í þessum blómum eða kortinu. Síðan rifjaðist upp fyrir mér að ég hafði eitt sinn svarað símanum á umferðaröryggissviðinu og þar var á línunni Sesselja Halldórsdóttir violuleikari með meiru. Við erum málkunnugar frá fyrri tíð og það vildi svo til að ég svaraði þegar hún hringdi. Erindi hennar var að hún býr við Hávallagötuna og þegar keyrt er út þá götu og inn á Túngötu þá er oft erfitt að sjá umferðina sem kemur ofan Túngötu því oft er stórum bílum lagt á stæðið neðan við Kristkirkju. Hún vildi athuga hvort ekki væri hægt að setja upp spegil svo auðveldara væri að átta sig á umferðinni um Túngötuna.

Í framhaldi af símtalinu þá sendi ég þessa fyrirspurn til þeirra sem sjá um þessi mál hjá Reykjavíkurborg. Einhverjum vikum seinna fékk ég svar um að ákveðið hefði verið eftir athuganir að setja spegil upp við þessi gatnamót.

Og spegillinn er greinilega komin á sinn stað!

Athugasemdir

[Heidi Strand, 22.3.2008 kl. 10:06]

Flott hjá ykkur. þetta er mikilvægur spegill.

[Lilja Guðrún Þorvaldsdóttir, 23.3.2008 kl. 00:39]

Takk fyrir það.  Kv. Lilja